வஹ்ரன், வஹ்ரன், நரகமும் காண்பாய் நீ!

ஓரான் என்பது அல்ஜீரியா நாட்டின் துறைமுக நகரம். ஆல்பெர் காம்யுவின் கட்டுரைகளில், கொள்ளைநோய் (La Peste) நாவலில்தான் இந்த நகர் பற்றி முதலில் வாசித்தேன். குறிப்பாக, கொள்ளைநோய் நாவலில். அல்ஜீரியாவில் பிறந்த ஃப்ரெஞ்சு நாட்டவரான காம்யு, 1941-ஆம் ஆண்டு பாரீஸ் நகர் வந்து நாஃஸி ஆக்கிரமிப்பை எதிர்க்கும் Combat குழுவில் இணையுமுன்பாக இளைஞராக வசித்திருக்கிறார், ஓரான் நகரில்.

அதற்கு ஆறாண்டுகள் கழித்து, அதாவது இரண்டாம் உலகப்போர் முடிந்த பிறகே, காம்யு இந்த நாவலை வெளியிட்டார். நகரைத் தாக்கும் கொள்ளை நோய்க்கு முகம் கொடுக்கிறார்கள், ரியு என்ற மருத்துவரும் சக மருத்துவப் பணியாளர்களும். இங்கே கொள்ளைநோய் என்பது கொள்ளைநோயைத் தாண்டி எதைக் குறிப்பது என்ற கேள்வி எழுந்தது, இதை அந்தக் காலகட்டத்தில் நாஃஸிஸத்தின் ஆக்கிரமிப்புடன் ஒப்பிட்டு எழுதினார்கள் என்றாலும் இந்தக் கொள்ளைநோயின் தாக்கம் என்பதற்கு ஒரு நிரந்தரத்தன்மை உண்டு என்றே நினைக்கிறேன். அதாவது நகரம் என்ற புலத்தை ஒருவிதத் திணை என்று கொண்டால் அதன் அழிவு என்ற சாத்தியமான உள்ளுறையின் விரிவாக்கம்தான் கொள்ளைநோய். இதன் தாக்கம் ஓர் எதிர்விதி, மனித வாழ்வின் ஓர் எல்லை என்ற அபத்தம். ஆக, மனித இனத்தின் தற்கால நிலை பற்றிய, அதன் அபத்தமான விதி அல்லது எதிர்-விதி பற்றிய தீவிர அலசல் இந்த நாவல் எனலாம்.

சார்த்தரின் உள்ளுமையும் இன்மையும் (L'Être et le néant) தத்துவ நூலின் அதே கோட்பாட்டுப்பிரச்னைகளை காம்யு இந்த நாவலில் கையாண்டு எழுதியிருக்கிறார். இரண்டையும் ஒருசேர வாசித்தபோது நான் அடைந்த ஆச்சர்யத்தை அளவிடவே முடியவில்லை!

இன்னொரு காலகட்டத்தில் நான் வாசித்ததெல்லாம் மறந்து வஸந்தம் தவறிய வேற்றுகிரக வருஷம் என்ற ஸர்ரியலிஸச் சாய்வு கொண்ட கதையை எழுதினேன் - அதில் கொள்ளைநோய் ஒரு நகரத்தைத் தாக்குகிறது. கனாநிலையில் நான் எழுதின இந்தக்கதையை நவீன விருட்சம் வெளியிட்டபோது சூரத் நகரைக் கொள்ளை நோய் தாக்கிவிட்டது!

ஓரான் நகரைக் காம்யுவின் நாவலில் கொள்ளைநோய் தாக்குவது, இரண்டாம் உலகப்போர் நடந்த காலகட்டத்தில்தான். அதேவேளை நகரம் என்பதன் வரலாற்றிலிருந்தே காம்யு மிக ஆதாரமாக ஒன்றை எடுக்கிறார். பதினேழாம் நூற்றாண்டில் லண்டன் நகரைத் தாக்கிய கொள்ளைநோய், வரலாற்றில் மிகப் பிரபலமானது. சிரியா நாட்டின் தலைநகராக விளங்கும் தமஸ்கஸ்தான், மிகப் பண்டைய காலத்திலிருந்து நகரமாகத் தொடரும் இடம் என்கிறார்கள், அங்கும் கொள்ளைநோய் தாக்கியிருக்கிறது. ஓரான் நகரின் வரலாற்றைக் காணும்போது, இந்த நகரத்தை ஸ்பானியர், துருக்கியர், ஃப்ரெஞ்சுக்காரர் எனப் பலரும் ஆண்டிருக்கிறார்கள் என்று தெரிகிறது. குறிப்பாக, பத்தொன்பதாம் நூற்றாண்டில் ஃப்ரெஞ்சு நாட்டவர் ஆக்கிரமித்த உடனாகவே கொள்ளை நோய் பெரிய அளவில் தாக்கியிருக்கிறது - அதாவது 1849-ஆம் ஆண்டில். ஆனால் அதற்கும் முன்பாக, பதினாறாம் பதினேழாம் நூற்றாண்டுகளிலும் ஓரான் நகரைக் கொள்ளைநோய் தாக்கியிருக்கிறது. இப்படிப் பல்லாயிரக்கணக்கானோர் மடிந்தார்கள்...

காம்யுவின் கொள்ளைநோய் நாவலுக்கு முன்பாகவே தம்முடைய விசாரணை (Der Prozess) நாவலை காஃப்கா எழுதிவிட்டார். கொள்ளைநோய் போன்ற ஏதும் வராமலேயே இதே அபத்தம் என்ற எதிர்-விதியைக் கையாண்டு எழுதியிருக்கிறார் என்பதில் இன்னும் ஆச்சர்யம்! காம்யு, தம்முடைய நாவலின் ஓரத்தில் காஃப்காவின் விசாரணை (Der Prozess) நாவலை வைக்கிறார். விசாரணை நாவலை ஒரு மர்ம நாவலாக பேதையொருவன் வாசிப்பதை விவரித்துச் செல்கிறார் காம்யு. காஃப்காவுக்கு இதைவிட அருமையாக அஞ்சலி செலுத்த முடியாது!

கிழக்கும் மேற்கும் சந்திக்கும் நகரான ஓரானிலிருந்து வெளியேறி வசித்த சிலரை அண்மையில் இங்கே லண்டனில் சந்தித்தேன். இப்போது சொந்த ஊர் திரும்ப முடியும் என்ற பரவசத்தில் இருந்தார்கள். இவர்களில் சிலர் ஃப்ரெஞ்சு அல்ஜீரியர்கள். சிலர் அராபியர். கொள்ளைநோய் நாவலில் வரும் ஓரான் பற்றிப் பேச்சு வந்தபோது அதை ஆன்மாவே அற்ற ஓர் நகராக, மரங்களோ புறாக்களோ இல்லாத நகராக காம்யு சித்தரித்திருக்கிறார், வேறு எவ்வாறும் அதைச் செய்திருக்க முடியாது என்றார்கள்.

ஓரான் நகர் உலகுக்கு அளித்திருப்பதில் முக்கியமானவை காம்யுவின் நாவலும் ரெய் என்ற இசைவடிவமும். ரெய் இசை, உடலின்பத்தை, பரவசத்தை நாடும் உன்மத்த நிலையைத் தூண்டுவதாக இருப்பதால் கடந்த சில ஆண்டுகளாக இந்த இசைவாணர்களுக்கு இஸ்லாமிய அடிப்படைவாதக் குழுக்கள் வைத்த தடைகள், அச்சுறுத்தல்கள் நிறைய. இதனால் ஓரான் இசைவாணர்கள் பலர் வெளியேறி வாழ்ந்தார்கள். ஊருக்கும் நாட்டுக்கும் திரும்ப முடியாத நிலை. ரெய் இசையின் பெயர்பெற்ற பாடகர் காலித்துக்கும் அதே நிலை இருந்தது. ஆனால் இப்போது அவர் ஊர் திரும்ப முடிகிறது.

என்னுடன் பேசிய ஓரான் வாசிகள் யாவரும் ஒரு பாடலைப் பாடினார்கள். காலித் அங்கே செல்ல முடியாத் நிலையில் ஓரான் பற்றிப் பாடிய பாடல் - அஹ்மத் வஹ்பி என்ற பிரமாதமான பாடகர் முதலில் பாடிய பாடல்தான் என்றாலும் இதைக் காலித் மேடையில் ஆலாபனை செய்து பாடும்போது அபாரமாகச் செல்கிறது. இதே பாடலை மொரோக்கா நாட்டைச் சார்ந்த பாடகி அஸ்மா எல் முனவர் மாற்றிப்பாடும்போது அப்படியே லயித்துவிட்டேன்.

தென்னாட்டு இசை அறிந்தோர், இந்தப்பாடல் அமைவது வகுளாபரணம் ராகத்தில் என்று எளிதில் கூறிவிடுவர், வடநாட்டுச் செவ்வியல் இசை அறிந்தோர் இதை பஸந்த் முகாரி அல்லது ஹிஜாஸ் என்பர் - என்றாலும் பாடகரையும் இசைக்குழுவையும் கேட்டு ரசிப்போரையும் அரபு மொழியினர் தரப் என்று விவரிக்கும் உடற்பரவசத்தில் ஆழ்த்தும் உணர்வை எப்படி விவரிப்பது! குறிப்பாக, இந்தப்பாடலில் எல்-கோர்பா (el-Ghorba - الغربة) என்ற இடம் வரும்போதெல்லாம் பாடகர்களும் ரசிகர்களும் உருகுவதைக் கேட்கலாம். எல்-கோர்பா என்றால் ஊர்திரும்ப முடியாத ஒருவித ஏக்கம், அந்நியத்தன்மை என்று பொருள் என என்னிடம் பேசியோர் சாதித்தார்கள் - என்றாலும் அதற்கும் கொள்ளைநோயின் தாக்கத்துக்கும் தொடர்புண்டு என்றே எனக்குப்பட்டது.

ஷெப் காலித் பாடும் வஹ்ரன், வஹ்ரன், நரகமும் காண்பாய் நீ! - 1
ஷெப் காலித் பாடும் வஹ்ரன், வஹ்ரன், நரகமும் காண்பாய் நீ! - 2
அஸ்மா முனவர் பாடும் வஹ்ரன், வஹ்ரன், நரகமும் காண்பாய் நீ! - 1
அஸ்மா முனவர் பாடும் வஹ்ரன், வஹ்ரன், நரகமும் காண்பாய் நீ! - 2

இன்னும் எத்தனையோ காலம் நாடுதிரும்ப முடியாத என் மொழி பேசுவோருக்காக, இந்தப்பாடலைத் தமிழில் தருகிறேன். காலித் மற்றும் அஸ்மா பாடும் முழுவரிகளும் இந்தத் தமிழாக்கத்தில் இல்லை. இன்னொரு விஷயம் - ஓரான் என்பது ஃப்ரெஞ்சுத் திரிபு. நகரத்தின் அரபுமொழிப் பெயர், வஹ்ரன். சிங்கத்துக்கு அரபு மொழியில் ஒரு பெயர் விஹ்ர். வஹ்ரன் என்றால் இணைபிரியாத சிங்கங்கள் என்று பொருள்.

வஹ்ரன், வஹ்ரன், நரகமும் காண்பாய் நீ!
உன்னை விட்டகன்றார் அறிஞர்!
உன்னை விட்டகன்ற ஏக்கத்தில், குழப்பத்தில்
அவர்!
ஏக்கம் தருவதோ சோகமும் துரோகமும்!

வஹ்ரனின் ஹம்ரி (பகுதி)ச் சிறாருடன்
விளையாடிக் களித்தேன்
ஸிடி எல் ஹூரிச் சிறாருடன்
இளைமையைக் கழித்தேன்
என் வாழ்க்கை முழுதும்
என் கலையும் இவருக்கே.

என் மண்ணின்
இரவு யாவும் அழகு.
எம் குழலின், முழவின்
எதிரொலியும் அழகு.
அந்த மண்ணுக்குச் செல்லும்
எவரிடமும்
அதைக் கைவிடாதீர்
என்பேன்.

ஆயுள் முழுதும் மறவேன்
எம் மண்ணை,
எம் மூதாதையரை.
நீரும் மறவாதீர் என
எம் உறவுகளிடம் கேட்பேன்
அவரோ
மார்க்கம் துறந்து
கோப்பையில் குடியிருப்பார்.

கோப்பைகள் மேஜையில்
ஒரு டஸன்.
அவரோ
அவற்றில் பத்தையும்
டக்கென்று குடிப்பார்.
குடித்து வருந்துவார்,
கோப்பையின் சூன்யம் கண்டு.
அதன் அழகோ
கொள்ளைநோயின் அழகு.

என் இதயம் பெற்ற
சோகத்தில்
வருந்தி உன்னை அழைப்பேன் -
வஹ்ரன், வஹ்ரன், நரகமும் கண்டாய் நீ!

பாடல், அரபு மூலத்தில் - شب خالد - وهران وهران
وهران وهران رحتي خساره
هجروا منك ناس شطارى
قعدوا في الغربه حيارى
و الغربه صعيبه و غداره

يا فرحي على اولاد الحمري
اولاد مدينه و سيدي الهواري
عديت معاهم صغري
لهم فني طول عمري

ما احلى صهريات بلادي
القصبه و القلالي صادي
يا اللي ماشين ليها غادي
وصوا يتهلوا في بلادي

عمري ما ننسى بلادي
أرضي و أرض اجدادي
وصيت اهلي على الناس
تركوا دينهم و تبعوا الكاس

يا الزينه بالكاس و المايده
راه عشره بلا فايده
وعدي على الطحطحه وعدي
كان زينها زين الودادي
رجعت غمه في فؤادي
وليت نبكي و ننادي