புலிகளின் பொன் - ஜோர்ஜ் லூயி போர்ஹெ

மஞ்சள் படுஞாயிறின் இக்கணம்வரை
எத்தனைமுறை என் கண்வைப்பேன்,
ஒருக்கிலும் சிறையென ஐயப்படாது
புதிர்வழி இரும்புக்கிராதிகள் பின்
நடந்துதேய்ந்த தன் வழி
திரும்பத்திரும்பச் செல்லும்
தசைநார் உடல்கொண்ட
வங்கப்புலியிதன்மீது!

பிறகு
பிறிதான புலிகள் தோன்றும்.
வில்லியம் பிளேக்கின்
எரியொளியாம் ஒளியெரியும் புலி.
பிறகுவரும் பிறிதான பொன்னும்.
ஸீயஸ் கடவுளுக்கும் வேடமிடும்
காமப் பொன் துளிமழை.
முடிவற்று
ஒன்பதாம் ஒன்பதாம் இரவில்
ஒன்பதொன்பது ஆழியென
ஒளிர ஒளிர பெருகும்
ஆழிப்பொன்.
என்னில் ஆண்டாண்டாய் நீங்கும்
என்னைத் திணறடிக்கும் பல வண்ணம்.
இப்போது தப்பியதோ
காம ஒளி
ஆதிப்பொன்
பிரியா நிழல்.
படுஞாயிறே!
புலியே!
தொன்மப் புராண அற்புதமே!
என் பொன்னே! இனிதினிதே!
இக்கரமிரண்டும் தீண்ட விழையும்
உன் வண்ணமுடிப் பொன்னே!

- Jorge Luis Borges, El oro do los tigres, 1975.
ஸ்பானிஷ் மொழியிலிருந்து தமிழாக்கம்.