இறந்தோர் - ஸில்வியா ப்ளாத்

ஒளிஞாயிறதன் வேகத்தில்
நீள்வட்டமாய்ச் சுழலும்

புனித ஆடை போல
களிமண் சவ்வில் ஒளியும்

முழுதாய்க் கவிழ்ந்த புவியின்
கருவறை பெரிதின்
தாலாட்டில் அடங்கும்
இறந்த மனிதர்
காதலில் போரில் கவனம் செலுத்தார்.

ஆன்ம சீஸரும் அல்லரிவர்.
தந்தையரின் பெருமித நாடும்
மீள வேண்டார்.
இறுதிக்கிடக்கைதனில்
இடறிவிழும் இவர்
உலகுச்சேதம் கண்டு
தாம் மறந்துபட விழைவர்.

மிகுசெம்மண் சுற்றி
ஆழத் தாலாட்டுக் காணும்
எலும்புக்கட்டை இவை
எழா,
நிர்மலமாய் எழா,
பேரழிவுபடும் நாளின்
அதிகாலை எக்காளத்தில்.
இவை அமிழும்
பிரம்மாண்ட உறக்கத்தில்.
கடவுளின் கறாரான
அதிர்ச்சிகொண்ட
தேவதை பலவும்
கதறி
எழுப்பவும் முடியாது
இவரை
இவர் விழையும்
இறுதி
இகழ்வான
அழுகலினின்று.

-- Sylvia Plath, The Dead, 1954.