அடுத்த ஓராண்டு தமிழ்ச்சினிமா இல்லை? -1

என் ஐம்பதாண்டு வாழ்வில் ஒரு விஷயத்தை நிச்சயமாகக் கூற முடியும்: என் மொழியாகிய தமிழ்பேசும் மனிதர்களுக்கும் சினிமாவுக்கும் உள்ள உறவு அசாதாரணமானது. அதாவது, அக-புற உலகுகளை சினிமா என்ற கண் வழி மாத்திரம் நோக்குமளவு செல்வது, இந்த உறவு. சொல்லப்போனால், தொழில்நுட்பம் என்பது முழுதமிழ்ச்சமுதாயத்திலும் சென்றுசேர்ந்து ஜீரணிக்கும் பிரதான வழிமுறை என்றும் கூறலாம்.

இந்த உறவை வேறு ஒரு துறையை வைத்துப் புரிய முயற்சிக்கலாம் என ஏற்கனவே எழுதியிருக்கிறேன்: அதாவது, எண்-கணிதத்தை எடுத்துக்கொள்ளலாம். தமிழர்களை ஒருவித முழு-எண்வரிசையாக (integers) உருவகிக்கலாம். இந்த எண்வரிசையில் உலகெங்கும் வசிக்கும் பலவகைத்தமிழர்களையும் சேர்த்துக்கொள்ளலாம். அப்போது இந்த அனைவரையும் சினிமா என்ற குறிப்பிட்ட எண்ணை வைத்து வகுத்துவிடலாம் என்று தோன்றுகிறது, மீதமே இருக்காது!

அதாவது, தமிழர்கள் என்ற முழு-எண்வரிசையில் பகா எண்கள் (prime numbers) என்பவை இருக்க வாய்ப்பில்லை - அதாவது இந்த எண்வரிசை 2,4,6,8,10.. எனச்சென்றால் சினிமா என்பதன் எண் இரண்டாக இருக்கும். 3,6,9,12, 15 எனச்சென்றால் சினிமா என்பது எண் மூன்று... இப்படிப்போகிறது வரிசை (உலகில் இந்த மாதிரி இந்தி, தெலுங்கு சினிமாக்கள்மீது எல்லைமீறிய நாட்டமுள்ள அந்தந்த ஊர்க்காரர்களையும் சேர்க்கலாம் என்பதும் சரிதான்). அந்த அளவு தமிழ்ச்சினிமாவுக்கு "இலக்கணம்" அல்லது இலக்கணங்கள் ஏற்பட்டு, என் மொழி பேசும் மனிதர்களின் மூளை-இயக்கத்தைத் தாக்கிவிட்டிருக்கிறது! குடிசைவாசிகளிலிருந்து இணையதளம் பாவிக்கும் இளைஞர்கள்வரை இது ஒன்றேபோல எனவும் தோன்றுகிறது!

எடுத்துக்காட்டாக, கறாரான அரசியல் கட்டுரைகளை வெளியிட்டுவரும் கீற்று இணைய தளத்தைப் பாருங்கள். சினிமா என்று வரும்போது இந்தக் கறார்த்தன்மை காணாமல்போய், கீழ்க்கண்ட செய்திகள் காட்டுவதுபோல, எல்லாம் நீக்குப்போக்காகி விடுகிறது (எந்த இணைய தளத்திலும் நிலைமை இப்படித்தான்):

"....மீண்டும் இணைகிறார்கள் ஸ்ரீகாந்த், பிருதிவிராஜ், விஷ்ணுவர்த்தனுடன் த்ரிஷா மோதல், கௌதம் மேனன் படத்தில் அஜித்,
உதவி இயக்குநர்களை நீக்கிய ஷங்கர், கதைக்கு முக்கியத்துவம் தரும் மீரா ஜாஸ்மின், ஆட்ட நாயகன் சக்தி, தயாரிப்பாளர்கள் விரும்பும் இயக்குனராக வெங்கட் பிரபு, அடிதடி பட வாய்ப்புகளே வருகின்றன - பரத், கமலுக்காக எந்த ரிஸ்க் எடுக்கவும் தயார் - த்ரிஷா, சூர்யாவின் இன்னொரு பரிமாணம் வாரணம் ஆயிரம், விளம்பரங்களில் நடிக்கும் பிரபு, தமன்னாவின் ஆனந்தத் தாண்டவம், கோவாவில் திரைப்பட பஜார், குசேலன் தோல்வி - விநியோகஸ்தர்கள் அதிருப்தி, கமலுடன் நடிக்கக் காத்திருக்கிறேன் - பத்மப்ரியா, பிரகாஷ்ராஜ் தயாரிப்பில் விஜய், த்ரிஷாவைக் காப்பாற்றுமா அபி?, குசேலன்: பிரியதர்ஷன் தாக்கு, கதாநாயகனாகும் இயக்குநர் சசிக்குமார், இந்தியில் பிரபலமாகும் ஜெனீலியா, 15 நாட்களில் 20 கோடி சம்பளம் வாங்கிய ரஜினி, மணிரத்னம் படத்தில் ப்ரியா மணி, தசாவதாரம் விமர்சனம்: வெளக்குமாத்துக்குப் பட்டுக்குஞ்சம், முன்னணி ஹீரோவான சுந்தர்.சி, 100 கோடிக்கு விற்பனையான குசேலன், 100 கோடியில் தயாராகும் மர்ம யோகி, ரஜினியின் இளமை(!) ரகசியம், சரண் இயக்கத்தில் வினய், கோபிகாவின் கடைசிப்படம், அகம்-புறம் படத்தில் ஷாம், அசினுக்கு மேலும் சில இந்திப்படங்கள், விருதுக்கு அமீர்தான் காரணம் - ப்ரியா மணி, வித்தியாச வேடத்தில் ஐஸ்வர்யா ராய், 'கல்லைக் கண்டால்..' கமலின் நம்பிக்கை, 'அயனி'லும் வில்லன் கேரக்டர் பேசப்படும் - கே.வி.ஆனந்த், திரைப்படமாகிறது அறிஞர் அண்ணாவின் வாழ்க்கை, 'படிக்காதவன்' தனுஷ், கம்ப்யூட்டர்மயமாகும் கமல் ரசிகர் மன்றங்கள், விஜய் ரசிகரான ஆஸ்திரேலியப் பிரதமர், ரஹ்மான் இசைப்பள்ளி, வணிக சினிமா என் நோக்கமல்ல - பிரகாஷ்ராஜ், ஸ்ரீனிவாசன் ஜோடியாக பத்மப்ரியா, இயக்குனர் நந்திதா தாஸ், வாழ்க்கையின் மிக முக்கியமான தருணம் இது - ரஜினிகாந்த், தமிழ்த்திரைப்படத்தில் குழந்தைகளுக்கான இடம் நிரப்பப்படவே இல்லை, கமல் மோகன்லால் இணைகிறார்கள்..."

ஆக, சினிமா என்பதாகத் தாங்கள் அறிந்ததைத் தமிழர்கள் கொஞ்சம் இடைநிறுத்தி யோசிக்க வேண்டியிருக்கிறது. மேலும் தமிழில் சினிமா-விமர்சனம் என்ற பெயரில் வரும் விஷயங்கள் பலதைக் கொஞ்சக்காலம் மறக்கவும் கற்றுக்கொள்ளலாம். சிரமம்தான் என்றாலும் முயன்றுபார்க்கலாம். சினிமா பற்றி வேறுமாதிரி சிந்திக்க வேண்டும்...

இன்னொரு கோணத்திலும் இந்த விஷயத்தைப் பார்க்கலாம்: கடந்த சில ஆண்டுகளில் தமிழ் வெகுஜன சினிமா பற்றிய ஆய்வுப்புலம் சற்றே அதிகரித்திருக்கிறது. பெரும்பாலும் சினிமா பற்றிய வரலாற்றுத்தரவுகளைக் கோர்ப்பதாக ஒருபுறம், வெகுஜன சினிமாவைப் பிரதியாக வைத்து, வாசித்து, விமர்சிப்பதாக மறுபுறம். இது போதுமா, தெரியவில்லை...

போதாது என்பதற்கு நல்ல உதாரணம், கடந்த அக்டோபர் நான்கு-ஐந்து சனி-ஞாயிறன்று, காட்சிப்பிழை இதழ் சார்பில் சென்னை பல்கலைக்கழக வளாகத்தில் நடந்த கருத்தரங்கு. தமிழ்ச்சினிமா பற்றிய வரலாற்றுரீதியான ஆய்வுகளைச் செய்த தியோடர் பாஸ்கரன் மற்றும் எம்.எஸ்.எஸ். பாண்டியன் பங்கேற்ற இந்தக் கருத்தரங்கில் வாசிக்கப்பட்டதாகத் தெரியும் ஆய்வுக்கட்டுரைகளின் தலைப்புக்களை நோக்கலாம் (நன்றி, வளர்மதியின் பனித்திரை).

"...ஏ.வி.எம்-ஒரு சரித்திர வாசிப்பு பற்றி ப்ரீத்தம் மற்றும் வெங்கடேஷ் சக்ரவர்த்தி, பேசும் படங்கள் பேசாத தளங்கள் பற்றி ப்ரேம், ஒளித்திரையில் உயிர்த்தெழும் சீதையும் கண்ணகியும் பற்றி மாலதி மைத்ரி, சின்னத்திரையும் பெரிய திரையும் பற்றி சுரேஷ் பால், நினைவிழக்கும் வரலாறுகளும் மருள்காட்சி வரலாறுகளில் உழலும் நினைவுக்குட்டைகளும் - வளர்மதி, உலகம் சுற்றும் வாலிபனும் தசாவதாரமும் பற்றி எதிர்வு சிவகுமார், கமலஹாசன் பெரியாரைக் கல்லில் கட்டிக் கடலில் விட்டெறிந்த கதை - சுந்தர் காளி, வடிவேலுவின் நகைச்சுவையில் தென்படும் உதிரித்தன்மையின் பன்முகம் - அமுதன், இசையுரு ஆகிய திரைஇசை - இளையராஜா என வேணுமணி, When a Woman Called Shots எனத் திரை அனுபவம் பற்றி லீனா மணிமேகலை, வீதியில் வெள்ளித்திரை - சினிமா பேனர்கள் பற்றிய சில குறிப்புகள் பற்றி வ. கீதா, கேள்விக்குறிகள் மூன்று போட்ட தலைப்பில் ராஜன்குறை..."

இதில் சினிமா இயக்குநர்கள் சிலரும் பங்கேற்றதாகத் தெரிகிறது... நிச்சயம் வரவேற்க வேண்டும்.. ஆனால் கட்டுரைகள் எப்படி இருந்தன, என்ன பேசினார்கள் என்ற முழுவிபரங்கள் இன்னமும் தெரியவில்லை. சரி, வரலாற்றுவிபரங்கள் தவிர இவற்றில் ஒரு கட்டுரை கூட சினிமா பார்க்கும் வெகுஜனங்கள் இடையே நிகழ்த்தப்பெற்ற கள ஆய்வின் அடிப்படையில் அமைந்திருக்குமா, தெரியவில்லை.

இப்படி ஒரு கருத்தரங்கில் நான் பங்கேற்கும் பட்சத்தில் என்ன செய்வேன்? மிகமிக அடிப்படையாக தமிழ் சினிமா பார்ப்பவர்கள், எடுப்பவர்கள், நடிப்பவர்கள், தொழிலாளர்கள், அதுபற்றி வாசிப்பவர்கள், அரட்டை அடிப்பவர்கள் வரை சென்று ஒரு சர்வே எடுப்பேன். அதில் பின்வரும் கேள்விகள் இருக்கும். பத்துக்கேள்விகள் என்று தொடங்கி பதினொன்றாகிவிட்டது. இதில் சர்வே எடுப்பவரும் பதில்சொல்ல வேண்டும் என்பது முக்கிய நிபந்தனை. காரணம், ஏற்கனவே கூறிய படி தமிழர்களில் சினிமாவுக்குப் புறத்தே யாருமில்லை என்பதே: (எனவே எவ்வளவு முட்டாள்தனமாக இருந்தாலும் என் பதில்களும் அடைப்புக்குறிகளில்):

1. எந்த வயதில் சினிமா பார்க்க ஆரம்பித்தீர்கள்? நினைவுதெரிந்து கண்ட முதல் சினிமா? என்ன உணர்ந்தீர்கள்?
(ஐந்து வயதில். ஆனந்த ஜோதி. அடுத்தது பலே பாண்டியா. அந்த வயதில் தீவிர எம்ஜியார் ரசிகன். தஞ்சாவூரில் சிவாஜி போஸ்டர்மீது சாணி கரைத்து ஊற்றிய டீக்கடைக்காரர்களுடன் சைக்கிளில் சென்றிருக்கிறேன். ஆனாலும் சென்னை லஸ்ஸில் காமதேனு அரங்கில் பலே பாண்டியா பார்த்தபோது சிவாஜி-எம்.ஆர். ராதா காட்சிகளில் சிரித்து ஸீட்டிலிருந்து விழுந்தது நினைவிருக்கிறது. நாய், பூனை குறுக்கே போகும் இந்த அரங்கு சில ஆண்டுகள் முன்பு இடிக்கப்பெற்றது).

2. கடைசியாக அரங்கில் அமர்ந்து பார்த்த தமிழ் சினிமா? (நினைவில்லை. ரொம்ப வருஷமாகிவிட்டது).

3. கடைசியாக அரங்கிலன்றிப் பார்த்த தமிழ் சினிமா எது, எங்கே, என்ன உணர்ந்தீர்கள்?
(பச்சைக்கிளி முத்துச்சரம். விமானத்தில். தூங்கிவிட்டேன். அதற்கு முன்பு அன்பே சிவம். அதுவும் விமானத்தில். தூங்கிவிட்டேன். அதற்கு முன்பு ஆயுத எழுத்து. விமானத்தில்தான். தூங்க முடியவில்லை. விமானத்தைவிட சப்தம்).

4. உங்களை மிகவும் தாக்கிய தமிழ்ச்சினிமா?
(அவள் அப்படித்தான். மிகவும் தாக்கிய தமிழ் நாடகங்கள் பல. உதாரணமாக, பராசக்தி).

5-அ. உங்களை மிகவும் தாக்கிய தமிழ்ச்சினிமா-அரசியல் சம்பவம்?
(திராவிட இயக்கத்துக்காக திருச்சி புனித சூசையப்பர் கல்லூரியில் கொடியேற்றி தண்டனை அனுபவித்த அந்துவான் என்ற எஸ்.ஏ. அசோகன் நாடகம், சினிமா எல்லாம் கழிந்து இறுதியில் சோ, ஜெய்சங்கர் போன்ற நிச்சய பிராமணர்களை நண்பர்களாக ஏற்று வாழ்ந்தது).

5-ஆ. உங்களை மிகவும் தாக்கிய தமிழ்ச்சினிமா-தொழில்நுட்ப சம்பவம்?
(பேசும்படக் காலத்தில் தைரியமாக எடுக்கப்பட்ட புஷ்பக விமானம் என்ற பேசாத படம் வெற்றிகண்டது. இந்தப்படம் சினிமாவின் அக-நினைவு (memory) எனலாம்).

6. தமிழ்ச்சினிமா பற்றி வாசிப்பதுண்டா?
(தமிழ் சினிமா பற்றிய சிறுகதைகள், நாவல்கள் வாசிக்கும் பழக்கம் உண்டு. பிடித்த நாவல் அசோகமித்திரனின் கரைந்த நிழல்கள். சினிமா மூலமாக நிறைய வாசித்திருக்கிறேன் - சிறுவயதில் கொங்குதேர் வாழ்க்கை அஞ்சிறைத் தும்பி பாடலை நாகேஷ் வாசிப்பதைக் கேட்டு குறுந்தொகை பற்றி அறிந்துகொண்டேன்; சர்வர் சுந்தரம் பாடல் பார்த்துவிட்டு மாமல்லபுரம் போயிருக்கிறேன்).

7. தமிழ்ச்சினிமா இசை?
(இசையென்றாலே உயிர். நிறையக்கேட்பேன். இலக்கியவாதி என்பதால் பாடல் வரிகள் அத்துப்படி. உதாரணமாக - நாற்பதாண்டுகள் முன்பு பார்த்த நாடோடி படத்தில் மறக்காத வரிகள் - ஒன்றே வானம் ஒன்றே நிலவு ஓடிச்சென்றன ஆண்டுகள் கோடி.. இப்படிப் பாடல்வரிகள் தவிர, குரல், வாத்தியம், ராகம், இசைவடிவம் என்று அக்குவேறாக எப்போதும் அலசல்தான். ஜகதலப்பிரதாபன் காலத்திலிருந்து இன்றைய கண்கள் இரண்டால், நாக்கமுக்க வரை up-to-date. மலையாளம் மட்டுமே நன்கறிந்த என் மகள் தமிழ்ப்பாடல்களில் என்னைவிட up-to-date).

8. தமிழ் தவிர வேறு இந்திய, உலக மொழி சினிமா பார்ப்பதுண்டா? அதிகம் தாக்கிய படங்கள்?
(நிறைய. எல்லா இந்திய, உலக மொழிகளிலும். பதின்பருவத்தில் என்னைத் தாக்கிய படம் மலையாள இயக்குநர் அடூர் கோபாலகிருஷ்ணனின் ஸ்வயம்வரம். இளம்வயதில் ரித்விக் கட்டக்கின் சுபர்ணரேகா - தமிழில் மறக்க முடியுமா என்ற படம் இதன் நாடக வடிவம். பிறகு ரெய்னர் வெய்னர் ஃபாஸ்பிண்டரின் A Year with Thirteen Moons, வெர்னர் ஹெர்ஸாக் எடுத்த Don Aguirre, The Wrath of God, அண்மையில் ழான்-லுக் கோதாரின் Histoire du Cinema - சினிமாவின் வரலாறு...).

9. தமிழ்ச்சினிமா உலகுடன் நேரடித்தொடர்பு உண்டா? என்ன செய்தீர்கள்? பிடித்ததா? அதை மீண்டும் செய்வீர்களா? தமிழ்ச்சினிமா மேம்பட அது உதவுமா?
(நேரடித்தொடர்பு இல்லை. என்றாலும் சென்னை வாழ்க்கையில் சினிமாத்துறை நண்பர்கள் பலர் இருந்தனர். தமிழ்ச்சினிமா பற்றிப் பேசுவதை இருதரப்புமே தவிர்ப்போம். வேறேதாவது பேசுவோம். சினிமா விஞ்ஞானம்-தொழில்நுட்பம் பற்றி, உலக சினிமா, இந்தியாவின் மற்ற மொழிகளில் சினிமா, கலை-இலக்கியம், இசை, இடதுசாரி அரசியல், இலங்கை-ஈழத்தமிழர் பிரச்னை எனப் பேசுவோம். இதெல்லாம் தமிழ்ச்சினிமா மேம்பட உதவுமா தெரியவில்லை, அதில் இருப்பவர்கள் மேம்பட உதவலாம்).

10. தமிழ்ச்சினிமாவின் எதிர்காலம் பற்றி என்ன நினைக்கிறீர்கள்? (அடுத்த கேள்விக்குச் செல்லவும்).

11. அடுத்த ஓராண்டு தமிழில் சினிமா கிடையாது, மற்றும் சினிமா பற்றிய சமாச்சாரங்கள், செய்திகள் எதுவுமே பத்திரிகைகள், தொலைக்காட்சி, இணையம் உள்ளிட்ட ஊடகங்களில் கிடையாது என்று வைத்துக்கொள்வோம்? உங்களுக்கு எப்படியிருக்கும்? தமிழர்களுக்கு என்ன ஆகும் என்று நினைக்கிறீர்கள்?
(ரிலையன்ஸ் ஃப்ரெஷ் முதல் லோக்கல் டீக்கடை வரை, பாரதீய ஜனதா முதல் கீற்று வரை - இப்படி ஜாதி, வர்க்க வித்தியாசமின்றி நிறையத் தமிழர்களுக்கு என்ன செய்வதென்று புரியாமல் பித்தம் பிடித்துவிடும். நாட்டில் நேரடி சர்வாதிகாரம், குழப்பம், குழு ஃபாஸிஸம் பெருக வாய்ப்புண்டு... எனக்கு தமிழ்ச்சினிமா இசையைக் கேட்க முடியாமல் பித்தம் பிடிக்கலாம் என்பதையும் சேர்த்துக்கொள்ளலாம்).